Skip to content

Fartogof-i

  • by

Emil ullup qeqqaqatigigakku nuannarilluagaalu eqqartorlugu: assiliineq. Uani qanoq oqaaseqarnersoq takujuk:

“Jeg er ikke uddannet fotograf, hvorfor jeg nødigt kalder mig det. Jeg er til gengæld super kreativ og brænder for at lærer faget, derfor hoppede jeg bare ud i det.
Sådan lidt omvendt og bagfra.. Som en rigtig fargotof*”

*fargotof bagfra = fotograf

Emil Stach-imik ateqarpunga, Aalborg Universitet-imilu attaveqaqatigiinnermi ilinniarsimasuullunga. Oqaatsit attaveqaqatigiinnerullu iluani kusanartut soqutigisariuaannarnikuuakka. Ukiullu arlallit qaangiummata kusaginninnera taanna assit iluanni aamma aallutarilersimallugu.

Eqqaamaqqissaarpara qangarpiaq assiliineq soqutigisarilersimagakku. Assiliivimmik atornikuullunga kalaaliaqqami erisartarfiani arnaq utoqqasaaq assilivara, fokuserernera qalipaataaluunniit eqqunngillat. Kisiannili asseq misigisimaneqarpoq uanga isumanni immikkuullarissumik! Taamaammat teknikkikkut uniuukkaluarluni assini nuannarinerpaasaraara.

Taamanili assiliinerup silarsuaani misilittagassarpassuit misilittarpakka – assersuutigalugu qalipaateqanngitsunik assiliinerit, eksponeringit sivisuut, perspektivit assigiinngitsut misilittarneri, assit manipuleringaatsiarneri maannalu nammineq isikkumik ilisarnaatinnik pissarsinikuullunga.

Assiliivigisartakkamma pisinnaasai ilisimallualernikuuakka, akunnerpassuillu Photoshop, qalipaatit, qaamaneq kiisalu kompositionit misissuataarsimavakka. Assiliinermi nuannarisarilluarpara, pisullu imaaliallaannaq peeruttussaagaluit pisarerusuttarlugit tammajuitsunngorlugit. Neriuppungalu tamanna aamma assinni takuneqarsinnaassasoq – qungujunnermik uummammillu tunngaveqartumik assit assilisat.

Assivit suut ilisarnaatigivai

Assiliisalinngikkallaramali assini kiap assilisarineraa takusinnaajuaannarnikuuara assiliisoq eqqaaneqanngikkaluartoq. Ullumi nalunngilara sooq. Assit redigerernissai assigiinngitsorpassuarnik pisinnaapput. 10.000-ssaalu assimik redigeriigaanni nutaaliornissaq pineqarneq ajorpoq. Taamaammat iliuutsit nalunngisat, iliuuserereernikuusat nuannarisallu uteqqittarput. Inuillu assiutikka ilisarissagunikkit takusinnaassajunnarsigavaat qungujunnertalimmik uummammillu tunngaveqartuusut.

Assit qungujunnertallit uummammillu pisut qanoq isikkoqarsinnaagamik? Qungujunnartuunerukkajuppoq. Assiutikka qungujunnartoqartuaannangajapput, qungujunnartoqanngippatalu oqaasertaani qungujunnartoqarajuttarpoq. Assiliisarnermi assinillu redigerinermi kontrastit, erseqqarinneq, qaamaneq qalipaatillu atorlugit assimik isiginnittoq sunarpiaq takussaneraa suliarineqarsinnaavoq. Assinik suliarinnittut tamarmik tamanna atugarisuuaat. Ilami nalorninartussaassanngilaq assimi suup tungaanut isiginissaq, aamma uanga assiutinni. Assiutikkami isit nalaannit assilisaapput, tunuliaqutaa ersernerlunnerusarpoq “rule of thirds”-ilu malillugu.

Assiutikka sukujuararpassuaqarneq ajorput, tamakkumi piiagaapput pingaarnerillu kiserngoruteqqasarlutik. Tamannalu tassa uanga isumanni uummammit assilisat. Sammisap assilisalluunniit pingaarnertavia tikikkaanni tassanngaanniillu naqissuseerusulluni, qisuariaalluunniit – eqqarsaat paasisaqarusunnerulernerluunniit pilersillugu.

Inoqatinut attaveqaatit assiliinermut qanoq atortarpigit?

Maannakkuugallaq Instagramiunerusoq atugaraara. Instagramimi pilersinneqarnikuuvoq sukkasuumik ajornanngitsumillu assinik siammarterisinnaanissamut. Kingornali kusassagaalluartunik assinik siammarteriffinngornikuuvoq. Tassa assit taamaattut qupperninni nassaarissavatit. Eqqarsaatigilluakkat, qanoq oqariartuuteqarusunninnut redigereeriaatsinnut oqaasertaanullu. Oqaluttuamut oqaluttuarerusutannut tulluarluartussaapput.

Instagram stories akerlianorpiaq atortarpara, tassa kusassagaanngitsunik takutsitsinermut. Tassani ulluinnarpalaartut, ilaqutariittut marlunnik mikisunik meeraqarluta inuunerput nuannisarnerillu siammartertarpakka.

Immaqa qaffaqqarpalulaaraluarpoq, kisianni tassa assiutikka takugukkit tassa qungujunnermik uummammiillu tunngaveqartumik assilisat.

Ingerlariaqqiffissat:

Emilip nammineq Instagramimi quppernera

Black and White – Justin Case Instagramimi quppernera

Justin Case Productions Instagramimi quppernera

Justin Case Productions Facebookimi quppernera

Leave a Reply

Your email address will not be published. Required fields are marked *