Malugiummit nittartagaq suliaq kingulleq tassaavoq Nanu meeqqat nittartagartaavat, uani takujuk. Nammineq aaliangersinnaasuugukku taamaattuinnarnik nittartagaliortassagaluarpunga 🥰
Nanu meeqqat kajumissutsiminnik sulipput. Peqatigiiffimmi sulisut tamarmik akissarsiaqaratik sulipput. Meeqqat ulluinnarni atugarliortut toqqissisimanerusumik inuunissaat anguniagarisuuaat. Meeqqanut tamanut inuunerissaarnissaq, ikiorneqarnissamut periarfissaqarneq Kalaallit Nunaanilu meeqqat atugarisaminnik kipisisinnaanissaat takorluugarivaat.
Nittartagartaartik maanna suliaminnut iluaqutissatsialattut sakkussarilerpaat, assersuutigalugu siunissami webshop-ikkut kinaluunniit aningaasaliilersinnaassaaq, peqatigiiffik pillugu paasisaqarluarsinnaalerluni ikiuinissamulluunniit allatsilluni.
Nittartakkap saniatigut Malugiuk Nanu meeqqat inuit attaveqaqatigiittarfianni ikiuilissaaq aamma. Tassani oqaluttuat oqaluttuarineqassapput, ikiuerusuttunik katersiffiussalluni, pilersaarutit aallarnerneqartassallutik allarpassuarnillu.
Inunnik taamak sulialinnik ikiuisinnaalluni – tassa suliat siunertaqarnerusut ❤️