Tusakkajuttarparput inoqatinut attaveqaatit piviusoorpasinngitsumik kusassarluakkamik takutitsinerusartut, stressertitsilersinnaasartut, nammineq naleqassutsimut imminullu tatiginninnginnerulernermik kinguneqartitsilersinnaasartut.
Qujanartumilli inoqatinut attaveqaatini ajunngitsorpassuarnik pissarsisoqarsinnaasarpoq aamma, aajukualu isumassatsialaat 3:
- Youtube-mi stressemik akiuineq
Youtubemi ulluni makkunani nuannarineqarluartut annersaraat ASMR videot. ASMR naluiuk suusoq? Wikipedia imannak nassuiaavoq (qallunaatut): “ASMR eller Autonomous Sensory Meridian Response, er en behagelig fornemmelse i hovedbunden eller i ryggen, der udløses af forskellige stimuli såsom lyden af en blyant, der tegner på papir eller en hviskende stemme. Fænomenet findes især i form af videoer på nettet.” Uani ASMR videot aamma takusinnaavatit.
ASMR iluaqutigaat isiginnaartoq tiguartilluartarmat, eqqarsaatinilu allarpassuarniinnani isiginnaagaq tusaasarlu kisiisa najorlugit. Taamaasillunilu isiginnaartoq ulluinnarni suliffimmilu suliassarpassuit stressertitsisut qimalaarlugit tassanerpiaq allat najornagit pisinnaammat iluatatsitaallunilu tusaasanik isigisanillu. - Instagram iluaqutigalugu nammineq naleqassuseq qaffallugu
Instagram tassaasinnaasarpoq assinik kusanarluinnartunik, timinik torraqqissaartunik, pisattanik pilerigineqarluartunik inisseqqinnaakkanik takutitsiviusartoq, tassanilu imminut qiviarluni eqqaasinneqarsinnaasarpugut timerput torraqqissaanngitsoq, assigut kusanarluinnaqqissaanngitsut. Qujanartumilli tamanna aamma akiorniarlugu inuit qisuariartalersimapput. Maannami qallunaatut oqaatigalugu kropsaktivister takussaallattaalerput. Quppernerillu ingamik arnat timitik isikkuviattut (kusassagaanngitsut soorlu photoshop atorlugu) takutitsisut, imminut tatigalutik, asallutik nuannaralutillu immaqa assersuutigalugu orsoqalaaraluarlutik ikeqaraluarlutilluunniit. Taamaasillutillu assimik piviusorpalaarnerusumik takutitseqataapput. Assersuutigalugu eqqaaneqarsinnaavoq Ashley Graham, uani takujuk. Hashtag-iluunniit #kropsaktivist aamma alakkarterneqarsinnaavoq.
Malinnaaffigineqarsinnaasut tamakkua malinnaaffigilikkit Instagram-imullu iseraangavit piviusorpalaarnerit assit takusalerlugit taamaasillutillu imminut aamma akuerinissaq qaninnerutillugu piviusorpalaanngitsunik malinnaaneq unitsiimillugu - Inoqatinut attaveqaatit aqqutigalugit inoqatit attaveqarfiginerulikkit
Ajornanngissinnaasarpoq angerlarsimaffimmit inoqatinut attaveqaatiniinnissaq inunnik allanik ilagisaqanngikkaluarluni. Kiserliorpilli inunnillu allanik ilaqarusukkaluarlutit? Taava inoqatinut attaveqaatit iluaqutigikkit. Assersuutigalugu Facebook-imi pisussat nuannerunartitatit nassaarikkit ornigullutillu, taava inuit allat assigiinnik soqutigisaqaqatit taamaasillutit naapissavatit immaqalu kammannik nutaanik nassaarlutit. Snapchat Instagram-iluunniit aamma aqqutigalugu inuit takorusunnersut aperisinnaavutit, immaqa aallaqqaammut sapernarsinnaassaaq angertoqarsinnaalluarporli aamma. Iliuuseqarlutit inoqatinut attaveqaatit atorluarlugit attaveqarnerulerit 🙂
Iluatsitsilluarina oqaluttuarusukkuillu ilinnut qanoq ingerlasimanersoq tikilluaqqusaavutit 🙂 Immaqa uffa aamma isumassatsialannik allanik peqaruttortutit? 🙂