Skip to content

Oqaatsit…?

  • by

 

Inoqatinut attaveqaatini siammerteritinnak oqaatsit sorliit atorneqassanersut eqqarsaatigisarpiuk? Immaqaluunniit siammarterisinnaasoq taassumalu oqaatsit atugarisai malinneqartarpat? Allatut oqaatigalugu: suliffeqarfivit aaliangiussarinikuuaa inoqatinut attaveqaatini oqaatsinik sorlernik atuinissaq?

Ilai qallunaatuinnaq, ilaalu kalaallisuinnaq amerliartortullu oqaatsit marluutillugit siammarterisarput. Misissuinernik nassaarsinnaasimanngilanga takutitsisunik oqaatsit sorliit atorneqarnerini iluarinninnerunermik takutitsisunik, taamaammallu tamanna pillugu allaaserisaqarsinnaananga. Namminerli Facebookimi qupperninni misilittaasarsimavunga aiammartigassat ilaat kalaallisuinnaq, ilaallu qallunaatuinnaq oqaasertalerlugit siammarterinermi. Tassami paaserusullugu sorleq soqutigineqarnerullunilu torrallaanerussanersoq. *

Takugajupparami qallunaatuinnaq siammarterisoqaraangat taassumalu apeqquserneqarnerani akissutit makku: “inunnut amerlanernut saaffiginnikkusukkatta” “malinnaasugut qallunaatut atuarumanerusaramik”, taamaammallu naatsorsuutigisimallugu qallunaatut siammartigara ingerlalluarnerussasoq. Tamannali kukkulluinnarpoq. Kalaallisoortaa inunnut 3000-it sinnerlugit amerlanernut annguppoq, liket assigisaallu marloriaammik amerlanerit oqaaseqaatillu amerlanerittaaq. Tamanna tupaallaatigisimavara. Inuit kalaallisuinnaq allaqqammat nuannarigaat? Malinnaasut kalaallisut oqaatsillit likerinerusarmata? Quppernera kalaallisut oqaasilinnik malinnaasoqarnerummat? Peqqutaasinnaasut amerlaqaat, kisiannili tassa piviusoq unaavoq kalaallisut oqaatsilimmik siammartigaq ingerlalluarnerujussuummat.

Eqqarsaatigisassarpassuit oqaatsit saniatigut sammisassat arlalippassuupputtaaq. Assersuutigalugu sunaana siammarterneqarnartoq? Qupperneq qanoq ittuua? Kikkut saaffigisassaappat? Siammartigassap sunarpiaq siunertarivaa? Tamanulli atuuttoq: oqaatsit sorliit atorneqarnissaata eqqarsaatigineqarnera aaliangernissaalu, eqqortumimmi ilioruit inuit saaffigisinnaasatit amerlanerujussuanngorsinnaammata – kiammi inoqatinut attaveqaatini saaffigisinnaasat amerlanerpaasinnannissaat soqutigisarinngilaa?

*misilittaanera siammarterinermik ataasiinnarmik  inerniliisuunngilaq arlalinnilli. Periarfissat assigiinngitsut atorneqarlutillu misilittaaffigineqarput, soorlu assinik atuineq, oqaatsit tulleriissaarneqarneri, akiliilluni siammarterineq assigisaallu. Ataatsimulli kalaallisut allaqqasut ingerlalluarnerpaapput.   

Leave a Reply

Your email address will not be published. Required fields are marked *