Skip to content

Nunap sajunnera

  • by
Asseq: GEUS
Asseq: GEUS

Ippassaq unnukkut maani Nuummi nunap sajunnera aamma malugaarput, tamannalu qaqutigooqaaq. Taamaammat paatsiveerunnalaarpoq uangalu eqqarsarsaatiga siulleq tassaanngilaq nuna sajuttoq – taamammi maani pisoqarneq ajorpoq ilaa?!

Igalaakkut marsereerlunga paasereerlugulu illorput lastbiilinit aporneqarsimanngitsoq (Nuummiuullunimi taamak eqqarsaqqajaanarneruvoq nunap sajunnerata eqqarsaatigineraniit) aatsaat eqqarsaatigilerpara nuna sajussimasoq – ilumoornerpami? Nangaariarnanga Facebook alakkarpara… Aarimmi aap nuna sajussimavoq, kammalaatikkami tamangajammik eqqartorpaat aammalu misigisimallugu. Ilaat aperipput ilumoornersoq nuna sajuttoq, allat oqaluttuarput suusorisimanerlugu sivitsunngitsorlu allamik eqqartuinngilagut kisimi nunap sajussimaneranik.

Ullaaq manna suli nunap sajussimanera pillugu siammartikkat takussaaqaat (assinilli nuannersunik meeraq ataatarlu takuneqarsinnaasunit taarserneqaleraluttuinnarluni). Siammartikkat ilai filmiaqqat sajuttumik takutitsisut (hehe), oqaluttuat nuannerluinnartut qujamasunnerli aamma takussaalluni – qujanaqaarmi ajornerusumik pisoqanngimmat immitsinnullu illaatigisinnaagatta.

Nutaarsiassattaaq aamma eqqartorpaat, Facebook-imilu aamma inuit qisuariarsimanerat eqqaallugu. Uani KNR ilanngutassiaa takujuk uanilu Sermitsiaq.ag-mit ilanngutassiaq takusinnaallugu. Taasariaqarpoq Sermitsiaq.ag-mi oqaaseqatigiit aappaanni Facebook eqqaaneqarpat, KNR-imilu quppernerup qeqqani eqqaaneqarmat.

Siammartigarpassuit, allaallumi nutaarsiassani ilanngutassianiit takuneqarsinnaavoq qisuariarninni kisimiinngitsunga – arlaannik pisoqarpat Facebook alakkarlugu!

Soormitaava taamaattoq? Aajukua uanga eqqaasinnaasakka (pingaarnerit):

  1. Kammalaatit sianeqattaarfiginissaannut sanilliullugu ajornannginnerujussuuvoq Facebook alakkapallalaarnissaa
  2. Smartphones ajornannginnerulersinnikuuaat, ilami mobiili tigoriarlugu app-eq ammaraanni aajukorpassuit
  3. Ataatsimoornermik misigissuseq ajornanngitsuaqqamik Facebook aqqutigalugu tikinneqarsinnaavoq. App-ip ammarnerinnaatigut inuit allat qanoq misigisimaneraat iserfigisinnaavarput, allanut naleqqiussinnaavugut assersuullutalu kammalaatittalu illarnartuliaannut illaqataasinnaalluta
  4. Facebook atorlugu nammineq oqaluttuarput siammartersinnaavarput – qanoq uanga misigivara? Suusorigaluarpara? Nammineq nittartagalioqqaarnata atuaasartunillu amerlisaaqqaarnata, nittartagaqareerpormi, kammalaatigullu atuaasartorivagut
  5. Inuttut pissuseqaarput ataatsimoorniarneq, aqqutillu ajornannginnerpaat soorunami atorpagut. Aap arfininngorpat kaffisorialerutta oqaluttuarissavagut, kisianni arfininngorpaatinnagu Facebook aqqutigalugu sukkasuumik ajornanngitsumillu siammartereqqaarsinnaavugut arfininngorpallu kiap kommenterersimaneraa ilanngullugu oqaluuserissaqqaarlugu

Immaqa uffa arlaata livestream-ersimagaa? 🙂

Leave a Reply

Your email address will not be published. Required fields are marked *