Facebook-imi allattariaaseq isummersortariaaserlu sakkortusigaluttuinnarput. Ajoraluartumik naliginnaalernikuuvoq isumaqatiginngisap oqaatsit sakkortuut atorlugit akerartornissaa. Immaqaana immitsinnut ajortumik sunneqattaartugut?
Uani eqqarsaatigivara soorlu immaqa inuk oqaatsinik sakkortuunik Facebook-imi atuinavianngikkaluaq ullup ingerlanerani unnukkulluunniit Facebook-imiinnermini oqaatsit sakkortuut inuit allat atoraat takullattaajuarlugu, piffissallu ingerlanerani kiisa nammineq aamma oqaatsinik sakkortuunik atorluni allattalertoq. Piffissammi ingerlanerani sungiussigaluttuinnarluni naggataatigut “tappingiusalluni” oqaatsit qanorpiaq sakkortutiginerannik, killigisaq piffissap ingerlanerani nikikkiartuaarluni – naggataatigullu tassa nammineq atuisalerluni allaat.
Inoqatinut attaveqaatini allanneq, inuttaanullu toqqaannaq oqarneq tassaapput marluk assigiinngitsorujussuit. “Toqqissisimanarneruvoq” skærmip tunuaniit smartphonemiilluunniit allanneq, inummut toqqaannaq oqaatiginninnermut sanilliutissagaanni. Tassani aamma ajornannginneerararsuuvoq taamaammat immaqa ulluinnarni naliginnaasumut inoqammut oqaatiginavianngisat oqaatsilluunniit atornavianngisat allaannarnissai.
Taamaammat kajumissaarummik apuussilaarusuppunga imannak: Facebook-imi allatit inutaanut toqqaannaq oqaatigisinnaavigit? Akissut naamiuppat allatatit siammarternagit, akissulli aappiuppat eqqarsaatigeqqilaarialugu ilumut pisariaqavinnersoq siammarterneqassasut aatsaat siammarterlugit. Sulimi ilinniarparput inoqatinut attaveqaatini qanorpiaq pissuseqarnissaq, immaqalu ilaanni killissarput nalunngikkaluarlugu ajornanngeriarmat qaangiinnartaripput.
Inoqatinut attaveqaatiniinneq nuanneqaaq, nuannersorpassuaqarlunilu. Taamaammat tamatta takutitsisa qanoq ikkusunnerluta – nuannersuujuartikkumallugu 🙂
Siammarterilluarina nuannisarluarinalu 🙂